aa ke meri jaan mein qaraar nahin hai
taaqat-e-bedaad-e-intazaar nahin hai
dete hain jannat hayaat-e-dahar ke badale
nashshaa baa_andaazaa-e-khumaar nahin hai
giriyaa nikaale hai teri bazm se mujh ko
haaye! ki rone pe ikhtiyaar nahin hai
ham se abas hai gumaan-e-ranjish-e-khaatir
khaak mein ushshaq ke gubaar nahin hai
dil se uthaa lutf-e-jalvaa haye ma_ani
gair-e-gul aaiinaa-e-bahaar nahin hai
qatl kaa mere kiyaa hai ahad to baare
vaaye! agar ahad ustavaar nahin hai
tu ne qasam maikashi ki khaai hai ‘Ghalib’
teri qasam ka kuchh aitabaar nahin hai
No comments:
Post a Comment